Pas takimit me Micotaqis, Rama ndryshon grupin negociator për Detin

Por, një ditë pas këtij takimi, Qeveria ka shkrirë grupin negociator të ngritur në Ministrinë e Jashtme, duke reduktuar pjesëmarrësit dhe duke ulur nivelin e përfaqësimit politik të tij.

Ndryshe nga komisioni i deritanishëm, që përbëhej nga ministrat, komisioni i ri do të përbëhet nga zëvendësministrat.

Duke nisur nga zëvendësministri i Jashtëm, që është njëkohësisht edhe kryetar, një zëvendësministër i Brendshëm, zëvendësministër nga Ministria e Mjedisit, zëvendësministër nga ministria përgjegjëse për furnizimin me ujë të pijshëm dhe kanalizimet, zv.ministër i Energjisë, zv.ministër i Bujqësisë dhe zv.ministër i Mbrojtjes.

Roli i sekretariatit teknik të këtij Komisioni i jepet sërish Agjencisë së Menaxhimit të Burimeve Ujore, por me kompetenca të ndryshuara.

Në grupin e parë, ky sekretariat kishte për detyrë katër pika, hartimin e programit të mbledhjes së komisionit, hartimin e drafteve sipas tematikave përkatëse, njoftimin e anëtarëve dhe realizimin e detyrave të tjera që i ngarkoheshin nga kryetari i Komisionit.

Në Komisionin e ri, Agjencia e Menaxhimit të Burimeve Ujore do të organizojë mbledhjet dhe njoftojë anëtarët, planifikojë dhe hartojë projekt-aktet sipas tematikave, realizojë çdo detyrë tjetër që i ngarkon kryetari i komisionit dhe raportoi periodikisht direkt tek Kryeministri për veprimtarinë e Komisionit.

Sipas këtij vendimi të miratuar këtë të mërkurë nga Qeveria, titullarët e institucioneve të përmendura në këtë VKM ngarkohen me detyrën që të caktojnë përfaqësuesit e tyre.

Ministri i Jashtëm në Detyrë, Gent Cakaj pritet që të caktojë zëvendësministrin e Jashtëm, Etjen Xhafajn, që do të jetë edhe kryetar i këtij komisioni.

Ndryshimi tjetër është edhe reduktimi i numrit të anëtarëve. Komisioni i mëparshëm përbëhej nga 13 anëtarë, ndërsa komisioni i ri do të jetë me 7 anëtarë. Gjithashtu, ndryshime pritet të pësojnë edhe grupet e punës me ekspertë të ngritura nga komisioni i mëparshëm.

Nuk dihet nëse ndryshimet janë kërkesë e kryeministrit të ri grek dhe as nëse dy palët do të vazhdojnë të punojnë mbi ato që u arritën në bisedimet e udhëhequra nga Kotzias-Bushati, apo gjithçka do të nisë nga zero.

Por, ajo që mund të thuhet deri më tani është që grupi i ri negociator shqiptar, përveç reduktimit të përbërjes bie edhe nga “pesha” e përfaqësimit, pritet të shoqërohet, sipas një tradite tashmë të konsoliduar në administratën Rama,  me hermetizimin e mëtejshëm të këtyre bisedimeve.