PELEGRINI: MALİ I ZI MUND TË BËHET REALISHT ANËTARJA E 28-të E BE-së DERI NË VITIN 2028

_{Foto: predsjednik.me}

Presidenti i Sllovakisë, Peter Pelegrini, ka deklaruar se vendi i tij mbështet fuqishëm ambicien e Malit të Zi për t’u bërë anëtari i 28-të i Bashkimit Evropian deri në vitin 2028, duke vlerësuar se Samiti BE–Ballkani Perëndimor, i mbajtur në qershor në Tivat, ishte një pikë kthese për vendin.

Në një konferencë të përbashkët për media në Bratislavë me presidentin e Malit të Zi, Jakov Millatoviq, Pelegrini tha se anëtarësimi i Malit të Zi në BE deri në vitin 2028 është një objektiv realist, nëse vendi vazhdon me ritmin aktual të reformave dhe mbylljes së kapitujve negociues.

Millatoviq theksoi se Mali i Zi ka hyrë në fazën vendimtare të rrugëtimit evropian, duke rikujtuar se të gjithë kapitujt negociues janë hapur dhe më shumë se gjysma janë mbyllur përkohësisht.

Pelegrini e cilësoi Malin e Zi si lider në procesin e integrimit evropian dhe premtoi mbështetjen e mëtejshme politike dhe ekspertizën e Sllovakisë për përfundimin e negociatave.

Dy presidentët diskutuan edhe për forcimin e marrëdhënieve dypalëshe, investimet, energjetikën, infrastrukturën, digjitalizimin dhe turizmin, ndërsa theksuan edhe rëndësinë e bashkëpunimit në kuadër të NATO-s dhe sigurisë evropiane.

Millatoviq tha se Mali i Zi dëshiron që fazën e fundit të negociatave ta përfundojë me institucione dhe projekte të gatshme për ditën e anëtarësimit, ndërsa Pelegrini theksoi se përfundimi i procesit malazez do të ishte një sinjal pozitiv për të gjithë Ballkanin Perëndimor.