SPANJË – 17 emigrantë humbin jetën në ishujt Baleare

MADRID, 4 gusht /ATSH-ANSA/-  Shtatëmbëdhjetë emigrantë kanë humbur jetën gjatë përpjekjes për të arritur në ishujt Baleare të Spanjës, pasi varka me të cilën udhëtonin mbeti në det për 15 ditë, bënë të ditur autoritetet spanjolle, bazuar në dëshmitë e dy të mbijetuarve, të cilët u shpëtuan nga Shërbimi i Shpëtimit Detar.

Sipas dëshmive të tyre, në bord ndodheshin fillimisht 19 persona që ishin nisur nga brigjet e Afrikës së Veriut.

Gjatë dy javëve në det, pa ndihmë dhe të lënë në mëshirë të rrymave, 17 prej tyre humbën jetën.

Dy të mbijetuarit, të dy me origjinë nga  vendet e Magrebit, u gjetën rreth 12,6 milje detare në jugperëndim të ishullit të Majorkës dhe u transportuan në spitalin Son Espases në Palma de Mallorca, ku po trajtohen për dehidrim të rëndë dhe kequshqyerje.

Pas dëshmive të tyre, autoritetet nisën një operacion kërkimi me helikopter dhe u bënë thirrje mjeteve lundruese në zonë të ndihmojnë në gjetjen e të mbijetuarve të mundshëm ose të viktimave.

Në një operacion tjetër të zhvilluar në agim, ekipet e shpëtimit shpëtuan edhe një varkë të dytë me 15 emigrantë  të tjerë, rreth 30 milje detare në juglindje të ishullit Ibiza. /Ad.Ab./ a.jor.