U lokalizua zjarri në Delibllatskën Peshçara, thotë Daçiçi — pas një muaji e gjysmë luftë me flakët
Mbi 10 mijë zjarrfikës e shpëtimtarë morën pjesë në shuarjen e flakëve në "Saharanë Evropiane"; nuk u dogj asnjë vendbanim dhe nuk u shkatërrua asnjë shtëpi, deklaroi ministri teknik i Brendshëm Ivica Daçiç.
Zjarri në Delibllatskën Peshçara, që shpërtheu në fshatin Shumarak në Vojvodinë, është lokalizuar pas një muaji e gjysmë luftë me flakët. Lajmin e dha ministri i Brendshëm në detyrë teknike, Ivica Daçiç, sipas raportimit të BBC News në serbisht.
Delibllatska Peshçara, e njohur si “Saharaja Evropiane”, është zona më e madhe ranore në Evropë dhe një rezervat natyror me mbi 900 lloje bimësh. Në shuarjen e zjarrit morën pjesë mbi 10 mijë zjarrfikës-shpëtimtarë dhe shërbime të tjera. “Asnjë vendbanim nuk u dogj dhe nuk u shkatërrua asnjë shtëpi”, deklaroi Daçiç, ndërsa shtoi se mijëra hektarë pyje e tokë u shkrumbuan — rreth 4 mijë hektarë tokë e djegur.
Në operacion u përfshinë edhe forca ndërkombëtare përmes mekanizmit të mbrojtjes civile të BE-së: avioni rus Il-76 hodhi 1 mijë ton ujë, ndërsa helikopterë nga Çekia, Rumania dhe Sllovakia, si dhe ekipe zjarrfikësish nga Gjermania e Rumania ndihmuan në terren.
Zjarri mori një jetë: një 70-vjeçar humbi jetën në Smederevë. Ministrja e Mjedisit, Sara Pavkov, ka shpallur një plan sanimi, ndërsa ekspertët thonë se do të duhen dekada për rikthimin e pyjeve. Presidenti Aleksandar Vučiç vizitoi zonën dhe mohoi se zjarri ishte vendosur qëllimisht.
Burimi: BBC News në serbisht / Danas
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.