Zjarr masiv në ishullin Braç, Kroaci — mes rreth 700 të evakuuarve edhe dy familje nga Cetina

Zjarri masiv që ka përfshirë ishullin kroat të Braçit vijon të luftohet prej ditësh dhe ende nuk është vënë nën kontroll. Era e fortë bora e ka rindezur zjarrin dhe e ka drejtuar flakën drejt vendbanimit Milna, duke vënë në rrezik serioz banesat dhe jetën e banorëve.

Situata u bë aq e rrezikshme, sa rreth 700 persona u evakuuan nga zonat e kërcënuara. Me rrugët tokësore të bllokuara nga flakët, e vetmja rrugë e sigurt shpëtimi ishte deti — anije detare u angazhuan për transportimin e banorëve drejt vendeve të sigurta.

Mes të evakuuarve ishin edhe dy familje nga Cetina e Malit të Zi. Vuk Latkoviq nga Cetina, në një prononcim për Dnevnikun e Televizionit të Malit të Zi (TVCG), tregoi momentet dramatike të asaj nate: “Kishim vajtur për gjumë, dola të shihja se çfarë po ndodhte dhe pashë se zjarri ishte afër. Ishim nëntë vetë. Shkuam drejt detit. Atje vumë fëmijët mbi një dyshek, notuam drejt anijes dhe natën e kaluam në ndonjë hotel.”

Të nesërmen, dy familjet u kthyen në kompleksin turistik ku ishin akomoduar dhe atje gjetën 330 persona. Makinat dhe sendet personale ishin shpëtuar, por vilat dhe akomodimi ishin djegur plotësisht nga zjarri.

Ndërkohë zjarrfikësit, në momentet e fundit, arritën të shpëtonin shtëpi e njerëz. Komandanti i DVD Supetar, Nikola Martinić Dragan, tha se në ato kushte taktika më e mirë ishte t’i linin njerëzit brenda objekteve të mbyllura mirë dhe ta mbronin objektin bashkë me ta. Banori Frane Serdar vlerësoi se rreth 20 shtëpi do të ishin shkatërruar po të kishin mbërritur zjarrfikësit gjysmë ore më vonë. Dy familjet nga Cetina theksojnë gjithashtu mbështetjen e madhe që morën nga ambasada e Malit të Zi në Kroaci gjatë gjithë kohës së evakuimit.

Burimi: RTCG