Berisha: Për procesin e Ergys Agasit duhet monitorim ndërkombëtar

Kreu i Partisë Demokratike, Sali Berisha, ka reaguar këtë të enjte për arrestimin e biznesmenit të kërkuar Ergys Agasi. Në një konferencë për mediat, Berisha e cilësoi arrestimin si një zhvillim pozitiv, ndërsa kërkoi përfshirjen e institucioneve ndërkombëtare në monitorimin e hetimit.

“Ajo çka PD kërkon, i bën thirrje Europolit, Eurojustit, vendeve partnere të monitorojnë me seriozitetin më të madh këtë proces”, deklaroi Berisha.

Sipas kreut të PD-së, përfshirja e institucioneve ndërkombëtare është e nevojshme pasi, sipas tij, aktiviteti i Agasit ka prekur edhe shtetas të huaj në Shqipëri.

Berisha ngriti akuza të forta lidhur me të dhënat e sistemit TIMS, duke pretenduar se Agasi ka pasur akses në informacione të pakufizuara dhe se ato janë përdorur në dëm të vendeve anëtare të NATO-s.

“Agasi ka qenë një rrezik për NATO-n. Agasi të gjitha të dhënat e sistemit TIMS, ua ka dhënë armiqve të NATO-s dhe kartelit të Troplinëve, midis të tjerash”, u shpreh ai.

Berisha kërkoi që hetimi të marrë një dimension ndërkombëtar, duke iu drejtuar Europolit, Eurojustit dhe agjencive ligjzbatuese të vendeve partnere.

Në vijim të deklaratës së tij, kreu i PD-së e lidhi drejtpërdrejt çështjen me kryeministrin Edi Rama, duke pretenduar se Agasi ka vepruar në emër të tij dhe nën kontrollin e tij.

Në përfundim, Berisha përsëriti kërkesën për dorëheqjen e kryeministrit Edi Rama.

“E mbyll këtë me thirrjen për dorëheqje urgjente të Edi Ramës, pasi nuk është gjë tjetër, veçse një Agas në karrigen e kryeministrit”, deklaroi Berisha.