Hapet sot në Athinë edicioni i 14-të i Platforms Project: mbi 1,100 artistë nga 22 vende, edhe nga Shqipëria
Platforms Project 2026, panairi më i madh ndërkombëtar kushtuar skenës së pavarur të artit vizual, hapet sot në Fabrikën e Duhanit të Parlamentit Grek në Athinë, me 66 platforma artistike dhe hyrje të lirë për publikun.
Hapet sot, më 17 shtator 2026, në Athinë edicioni i 14-të i Platforms Project – Independent Art Fair, panairi më i madh ndërkombëtar i artit vizual kushtuar skenës së pavarur artistike. Ekspozita do të mbahet nga 17 deri më 20 shtator 2026 në Fabrikën e Duhanit të Parlamentit Grek (Tobacco Factory-Hellenic Parliament), në adresën 218 Lenorman Avenue, Athinë — për të tretin vit radhazi në këtë hapësirë ikonike industriale që vihet në dispozicion me mbështetjen e Parlamentit Grek.
Këtë vit marrin pjesë 66 platforma artistike dhe mbi 1,100 artistë nga 22 vende — Greqia, Qipro, Britania e Madhe, Suedia, Emiratet e Bashkuara Arabe, Finlanda, SHBA, Austria, Gjermania, Franca, Australia, Korea, Polonia, Belgjika, Turqia, Irlanda, Brazili, Portugalia, SHQIPËRIA, Kolumbia, Japonia dhe Rumania — të përzgjedhur nga qindra aplikime të ardhura përmes thirrjes ndërkombëtare të hapur. Ndër platformat pjesëmarrëse është edhe “SATELLITE ZONE” nga Shqipëria.
Projekti drejtohet nga artistët vizualë Artemis Potamianou dhe Michalis Argyrou, ndërsa drejtimin artistik dhe kuratorinë e edicionit 2026 e mban Potamianou. Gjatë 14 viteve, Platforms Project është shndërruar në një qendër ndërkombëtare bashkëpunimi dhe shkëmbimi idesh mes artistëve, kuratorëve, teoricienëve dhe hapësirave të pavarura të artit.
Krahas ekspozitës kryesore ofrohet një program i gjerë paralel me 57 performanca, 14 biseda tematike dhe konferenca, prezantime librash, workshop-e, vizita të drejtuara dhe aktivitete edukative. Ekspozita shoqëruese “M#3, Moments, Meetings, Memories” prezantohet në Lofos art project me 41 artistë që kanë marrë pjesë në edicione të mëparshme. Hapja zyrtare është sot (17 shtator) nga ora 18:00 deri 22:30; nga e premtja në të dielën (18–20 shtator) ekspozita vizitohet nga ora 12:00 deri 21:00, me hyrje të lirë për publikun (me paraqitjen e një dokumenti identifikimi).
Burimi: art scene athens
Foto: Platforms Project / art scene athens
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.