Marrëveshja me SHBA me procedurë te përshpejtuar, Berisha: Jemi pro, por nuk votojmë procedura antikushtetuese

Kuvendi shqyrtoi me procedurë të përshpejtuar marrëveshjen e huasë 302 milionë dollarë me Shtetet e Bashkuara për modernizimin e Forcave të Armatosura.

Kryetari i Partisë Demokratike, Sali Berisha, ka kundërshtuar mënyrën e ndjekur nga mazhoranca për miratimin e kësaj marrëveshjeje, duke e cilësuar një veprim antikushtetues.

Në një komunikim me mediat, Berisha theksoi se opozita është pro huasë me SHBA-në, por kërkon që procedura parlamentare të respektojë Kushtetutën.

“Është akt i turpshëm i Ramës, i cili një kredi të qeverisë së SHBA për qëllime mbrojtje, për çka PD është mirënjohëse, do me çdo kusht ta kalojë me procedurë jo kushtetuese. Ka një përcaktim kushtetues e cila nuk lejon votimin me procedurë të përshpejtuar pa një afat minimal një javor. Kërkon të dhunojë kush dhe të para si flamurtar për plotësimin e buxhetit të NATO-s. Ne nuk votojmë në procedura anti kushtetuese. Ne jemi pro kredisë, por në kërkojmë që kjo procedurë të bëhet në përputhje me kushtetutën dhe jo vullnetin antikushtetues të Ramës. Qeveria e SHBA e ka dorëzuar në qeverinë shqiptare këtë marrëveshje muaj më parë. Kaloi në qeveri me 20 e ca qershor dhe e mbajtën nga 20 e ca qershori për ta sjellë në kuvend me 24 korrik dhe për ta kaluar me çdo kusht me procedurë të përshpejtuar. Grupi i PD ofroi propozimin e saj për të ndjekur rregullin kushtetues, në mënyrë që kuvendi të mblidhet dhe të enjten. Rëndësi ka që në mënyrë absolute nuk votojmë në procedura antikushtetuese”, tha Berisha.