Mbledhja me drejtuesit politikë në Pogradec, Rama: Do krijohet platforma “Pasqyrë Albania”, zgjidh hallet e qytetarëve

Kryeministri Edi Rama ka shpjeguar pikat që janë diskutuar në mbledhjen me 12 drejtuesit politikë të Partisë Socialiste, bashkë me kryetarët socialistë të Komisioneve Parlamentare.

Përmes një video të shpërndarë në Facebook, nga qyteti i Pogradecit, Rama thekson se në takim është diskutuar për programin “Besa” dhe aneksin e tij, “Prania Besnike”.

“Nga Pogradeci kur dielli po perëndon mbi liqen, aty ku Lasgushi gjente frymëzimet e veta magjepsëse dhe aty ku ne u përpoqëm të mbledhim së bashku reflektimet e një periudhe pushimesh aktive e lidhur me sezonin e ri politik. Kemi diskutuar për Besën, kemi diskutuar për Praninë Besnike, kemi diskutuar për ekosistemin e ri të komunikimit të qeverisë, jo në kuptimin thjesht të komunikimit publik, por të komunikimit me qytetarin”, shprehet kryeministri.

Sipas kryeministrit, gjithashtu është diskutuar për inicimin e një platforme të quajtur “Pasqyrë Albania” ku përmes së cilës qytetarët do të kërkojnë të shtrojnë problematikat e tyre dhe të marrin zgjidhje për to.

“Kemi diskutuar edhe për pasqyrën unike, ‘Pasqyrë Albania’, ku qytetarët do të kenë të pranishëm të gjithë institucionet dhe ku ambicia është që më herët se vonë të arrijmë pikën që çdo kërkesë, çdo shqetësim, çdo hall i qytetarit drejtuar institucioneve të jetë si një pako postale, statusi i të cilës ndiqet në kohë reale nga dërguesi dhe nga ana tjetër shteti, qeveria, institucionet ndjekin përgjegjësitë dhe çdo shkelje afati shihet me lupë”, tha më tej kryeministri Rama.