Pas takimit me drejtuesit e PS-së, Rama mbledh në Pogradec kabinetin qeveritar

Një ditë pas takimit me drejtuesit politikë të Partisë Socialiste në 12 qarqet dhe krerët e komisioneve parlamentare në Pogradec, kryeministri Edi Rama do të mbledhë këtë të hënë ministrat e kabinetit qeveritar. Takimi pritet të fokusohet te puna e bërë gjatë vitit të parë të mandatit të katërt qeverisës të socialistëve, si dhe te prioritetet dhe objektivat për vitin e dytë të mandatit.

Ministrat pritet të raportojnë para kryeministrit mbi punën e kryer në dikasteret që drejtojnë, ecurinë e projekteve dhe angazhimet që synojnë të realizojnë në vijim. Mbledhja vjen një ditë pas takimit të zhvilluar në Pogradec me drejtuesit politikë të PS-së në 12 qarqe dhe drejtuesit e komisioneve parlamentare, ku në fokus ishte organizimi dhe prioritetet e forcës politike në vijim. Gjatë takimit të një dite më parë u prezantuan edhe “Besa” dhe “Pasqyra Albania”, një platformë që, sipas kryeministrit Rama, synon të krijojë një sistem të unifikuar për evidentimin dhe ndjekjen e shqetësimeve të qytetarëve.

Rama tha se ambicia është që çdo kërkesë apo problem i qytetarëve të regjistrohet dhe të ndiqet në kohë reale nga institucionet përgjegjëse, duke bërë të monitorueshme edhe respektimin e afateve. Ndërkohë, përmes një postimi në rrjetet sociale, kryeministri ka publikuar edhe një fotografi nga Pogradeci, të cilën e ka cilësuar si një “fragment kristali të natyrës pogradecare”.