Për herë të parë në Holandë, një fëmije nën moshën 12 vjeç i nënshtrohet eutanazisë. Nisin hetimet

Për herë të parë në Holandë, një fëmijë nën moshën 12 vjeç, i sëmurë rëndë, i është nënshtruar eutanazisë. Vdekja e fëmijës u zbulua në një letër nga Ministrja e Shëndetësisë Sophie Hermans drejtuar parlamentit holandez. Eutanazia ndodhi në fund të vitit të kaluar.

Eutanazia për fëmijët e sëmurë terminal të moshës nga një deri në 12 vjeç ka qenë e ligjshme për dy vjet. Përpara ndryshimit, eutanazia ishte një mundësi vetëm për të porsalindurit dhe ata mbi 12 vjeç.Sipas ligjit holandez, prindërit duhet të konsultohen dhe fëmija duhet të ketë sëmundje të pashërueshme. Një komision shqyrtimi u ngrit për të shqyrtuar ligjin e ri dhe ka shqyrtuar rastin e fëmijës së paidentifikuar dhe ka folur me mjekun e përfshirë.

“Komiteti i ka ndarë gjetjet e tij me prokurorët të cilët do të vendosin nëse mjeku ka vepruar në përputhje me ligjin. Raporti i komitetit pritet së shpejti,” tha ministrja e shëndetësisë.

Kur ligji hyri në fuqi dy vjet më parë, u vlerësua se do të kishte pesë deri në dhjetë raste të eutanazisë së fëmijëve në vit. Bëhet fjalë për fëmijë që pritet të vdesin në të ardhmen e afërt dhe dhimbja e të cilëve nuk mund të lehtësohet në mënyrë të mjaftueshme.Përpara legjislacionit, nuk kishte një politikë të qartë mbi eutanazinë për fëmijët e moshës një deri në 12 vjeç, pasi ata konsideroheshin të paaftë për të marrë vendimet e tyre.Megjithatë, tashmë ekzistojnë rregullore për eutanazinë e foshnjave me sëmundje terminale deri në një vjeç dhe fëmijëve të moshës 12 vjeç e lart. Holanda ishte vendi i parë që legalizoi vetëvrasjen me ndihmën e mjekut në vitin 2002 për njerëzit me sëmundje terminale që shkaktojnë dhimbje të padurueshme fizike ose mendore.Eutanazia është e ligjshme vetëm në kushte të caktuara dhe mbështetet nga opinioni publik në Holandë. Në vitin 2014, Belgjika fqinje u bë vendi i parë në botë që e bëri të disponueshme eutanazinë me ndihmën e mjekut për të gjithë fëmijët.