Projektligji për menaxhimin e kimikateve, Jaupaj: Heq barrierat administrative, përafrim me legjislacionin e BE-së

Ministri i Mjedisit, Sofjan Jaupaj, prezantoi projektligjin “Për disa ndryshime në ligjin për menaxhimin e kimikateve”, i cili synon përmirësimin e administrimit të kimikateve në vend dhe përafrimin e mëtejshëm të legjislacionit shqiptar me atë të Bashkimit Europian.

Sipas ministrit janë evidentuar disa nevoja konkrete për përmirësim, veçanërisht sa i takon qartësimit të kompetencave mes institucioneve dhe përshtatjes me kërkesat e legjislacionit europian.

“Administrimi i kimikateve do të jetë më efikas, më modern dhe më i përafruar me legjislacionin e BE-së. Kemi evidentuar disa nevoja konkrete për përmirësim. Ka mbivendosje kompetencash mes institucioneve dhe duhet të përshtatemi me legjislacionin europian”, u shpreh Jaupaj.

Një nga ndryshimet kryesore të propozuara lidhet me licencimin e kimikateve të rrezikshme. Ministri bëri të ditur se heqja e këtij detyrimi synon të reduktojë barrierat administrative për bizneset, pa cenuar kontrollet dhe monitorimin institucional.

“Një tjetër element lidhet me tregun e brendshëm europian, ku licencimi i kimikateve të rrezikshme përbën një barrierë administrative. Ligji propozon heqjen e kësaj licence, duke hequr një hap burokratik, por jo kontrollin”, deklaroi ministri.

Sipas Jaupaj, ndryshimet do të sjellin procedura më efikase administrative, një menaxhim më modern të kimikateve dhe do të ndihmojnë në krijimin e një ekonomie më konkurruese.

“Projektligji përcakton qartë kontrollet institucionale dhe lidhet edhe me përafrimin e ligjit me atë të BE-së në procesin e negociatave. Ligji krijon procedura më efikase, administrim më modern dhe ekonomi më konkurruese dhe nuk ka efekt financiar shtesë për buxhetin e shtetit.

Ky është një ndryshim që lehtëson barrën administrative për biznesin dhe përafron legjislacionin e vendit me atë të BE-së”, tha ai.