Rama mbërrin në Kuvend, pritet votimi i projektligjit të PS-së për pagat e magjistratëve

Seanca plenare e Kuvendit vijon prej orës 10:00 të paradites, në një diskutim maratonë ku në rendin e ditës është edhe projektligji i paraqitur nga PS për pagat e magjistratëve.

Në mbrëmje, në seancën plenare është paraqitur edhe kryeministri Edi Rama, teksa deputetët vijojnë diskutimet për ndryshimet e propozuara në sistemin e pagave të gjyqtarëve dhe prokurorëve.

Sipas projektligjit që pritet të votohet në Parlament, piramida e pagave mban si referencë pagën e Presidentit, por koeficienti pëson një rritje të lehtë.

Drafti i shumicës parashikon një rritje prej rreth 8 500 lekësh të pagës referuese, ndërsa magjistratët kanë kërkuar një rritje rreth nëntë herë më të lartë. Kërkesa për një nivel më të lartë page është mbështetur edhe nga Këshilli i Lartë Gjyqësor dhe Këshilli i Lartë i Prokurorisë.

Efekti financiar i ndryshimit shkon në 2 miliardë lekë të reja në buxhetin e shtetit, ndërsa shtesat e prapambetura do të merren me këste gjatë dy viteve të ardhshme.

Projektligji është kundërshtuar nga opozita. Kreu i grupit parlamentar të PD-së, Gazment Bardhi, e cilësoi nismën një “puç kushtetues” dhe deklaroi se demokratët do të votojnë kundër.

Opozita kërkoi tërheqjen e projektligjit për konsultime të mëtejshme me institucionet e drejtësisë, por kërkesa u rrëzua me 79 vota kundër.

Debati për pagat e gjyqtarëve dhe prokurorëve ka vijuar prej orësh në Kuvend, ndërsa seanca pritet të përmbyllet me votimin e projektligjit të propozuar nga PS.