Rutte: NATO-ja do të sigurojë që KFOR-i të mbetet i fortë gjatë dhe pas 16 shtatorit

Sekretari i Përgjithshëm i NATO-s, Mark Rutte, deklaroi sot se përkushtimi i Aleancës për ruajtjen e paqes dhe sigurisë në Kosovë do të mbetet i pandryshuar, pavarësisht zhvillimeve të mundshme që lidhen me shpalljen e dënimit ndaj katër ish-drejtuesve të Ushtrisë Çlirimtare të Kosovës. NATO-ja, tha ai, do të sigurojë që KFOR-i të mbetet i fortë gjatë dhe pas 16 shtatorit dhe ta përmbushë mandatin e tij.

Dhomat e Specializuara të Kosovës në Hagë do të shpallin më 16 shtator dënimin ndaj ish-presidentit të Kosovës Hashim Thaçi, ish-kryeparlamentarëve Jakup Krasniqi dhe Kadri Veseli, si dhe ish-deputetit Rexhep Selimi, të akuzuar për krime lufte dhe krime kundër njerëzimit. Të katërtit janë deklaruar të pafajshëm për të dhjetë pikat e akuzës.

“Kjo vlen edhe sot, pavarësisht lajmeve që mund të vijnë këtë javë apo në periudhën e ardhshme”, tha Rutte në një konferencë për media në selinë e NATO-s në Bruksel, duke iu përgjigjur pyetjes nëse është i shqetësuar për trazira të mundshme në Kosovë dhe në rajon pas shpalljes së dënimit në Hagë. Ai tha se KFOR-i është në Kosovë që NATO-ja të kontribuojë për stabilitetin dhe paqen, dhe se misioni paqësor i Aleancës për më shumë se dy dekada ka kontribuuar në krijimin e një mjedisi të sigurt dhe të qëndrueshëm në Kosovë.

Kreu i NATO-s shtoi se Aleanca perëndimore do të vazhdojë të vlerësojë përbërjen dhe vendosjen e trupave të KFOR-it, për të siguruar që misioni të përshtatet siç duhet me situatën e sigurisë në Kosovë, dhe theksoi se zhvillimet në Kosovë ndikojnë edhe në rajonin më të gjerë.

Deklaratat e kreut të NATO-s vijnë disa orë pasi Ambasada e Shteteve të Bashkuara në Prishtinë u bëri thirrje qytetarëve amerikanë të shmangin lëvizjen pranë vendeve ku janë njoftuar protesta më 16 shtator. Sipas ambasadës, disa organizata planifikojnë demonstrata të mëdha më 16 shtator në qendër të Prishtinës dhe në qytetet e tjera kryesore të Kosovës.

Policia e Kosovës, si përgjigjja e parë e sigurisë, njoftoi se ka mbajtur takim me partnerët ndërkombëtarë, përfshirë KFOR-in, EULEX-in, Ambasadën e SHBA-së, Zyrën e Bashkimit Evropian dhe OSBE-në, ku u prezantua plani dhe angazhimet e Policisë për zhvillimet që lidhen me 16 shtatorin. Policia do të garantojë sigurinë e të gjithë qytetarëve pa dallim dhe angazhimin e njësive policore që çdo aktivitet dhe zhvillim i mundshëm të zhvillohet në mënyrë paqësore dhe pa incidente, me kufizime të mundshme të përkohshme të trafikut.

Burimi: Danas